Ass. Wr. Wb.
Alhamdulillah
Wassukru ala niamilah. Wassolatu Wassalam ala Rosulillah. Wa Ala Alihi Wa
Sohbihi Wa maw walah amma ba’du
Girang
pangajeng anu ku sim kuring dipihormat, Bapa miwah ibu guru anu ku sim kuring dipihormat,
rerencangan sadaya anu ku sim kuring dipikameumeut.
Langkung
tipayun mangga urang panjatkeun puja sinareng puji ka dzat Illahi Robbi, anu
parantos nakdirkeun urang sadaya, tiasa patepung lawung paamprok jonghok dina
ieu kasempatan anu sakieu mulyana. Mudah-mudahan Allah SWT tetep masihkeun
pitulung sareng taufik-Na ka urang sadaya, dugi ka urang tiasa nyuprih hikmah,
padilah sinareng manfaat, tina ieu acara sareng pamaksadan. Hadirin anu mulya,
Allah parantos ngagelarkeun makhlukna, tegesna umat manusa, kalayan rupi-rupi
ras, bangsa, suku, sinareng golongan. Masing-masing ras, bangsa, sareng suku
teh aya dipirang-pirang tempat sareng wilayah anu benten, ngagaduhan adat, budaya, bahasa sareng kabiasaan
sewang-sewangan. Didawuhkeun dina kitab-Na, sadaya eta teh sangkan tiap-tiap
bangsa, ras sareng suku teh silih kenal, silih hormat, jeung silih ajenan.
Litaarofu, kitu didawuhkeun dina
Al-Qur’an!
Hadirin
anu mulya, budaya anu tumuwuh di masing-masing bangsa sareng suku bangsa teh
ngajenggelek jeung ngawujudna nyaeta dina basa, kasenian, pakean sareng adat
kebiasaan sanesna. Sajaba ti eta, aya budaya anu langkung linuhung nyaeta
budaya anu ngajenggelek dina wujud elmu pangaweruh, teknologi sareng anu
sanesna.
Urang
sadaya salaku warga hiji suku bangsa, nyaeta suku sunda kab. Majalengka, kawaris ku para karuhun, hiji
budaya nyaeta budaya Sunda. Kakoncara budaya anu linuhung, anu rembeuy ku seni
anu luhur ajenna, waditra anu dipikawanoh ku sakumna jalma saperti seni Gaok, Sampyong, Sintren, seni kuda
renggong, seni Gembyung, sareng sajabina. Seni tari anu kakocap ka manca nagara sapertos seni seni tari topeng klasik, sareng Tarling. Ieu
mangrupakeun salah sahiji kabanggaan keur urang balarea salaku urang asli
Majalengka.
Salian ti
budaya seni anu tos di sebatkeun nembe, Majalengka oge ngagaduhan ciri khas
budaya tina perkawis anggoan, nyaeta anggoan batik. Batik mangrupakeun anggoan
nasional pikeun bangsa Indonesia anu tos diakui ku dunia. Tiap tiap daerah di
Indonesia ti mimiti Sabang dugi ka Merauke eta ngagaduhan motif khas daerahna
masing-masing anu ngagambarkeun ciri khas eta daerah. Kitu oge sareng daerah
urang ieu sadaya nyaeta kab. Majalengka anu ku urang sadaya di pikameumeut, ngagaduhan
motif batik anu ngalambangkeun ciri khas daerah urang ieu, sapertos ;
1.
Motif “Kota Angin” motif kota angin dikawitan tina julukan “ Majalengka Kota Angin “.
2.
Motif “Simbar
kencana” Mangrupakeun motif anu ngagambarkeun carita rakyat Majalengka, anu
tepatna mah ti kecamatan Talaga atanapi anu kapungkurmah di wanoh ku urang
balarea mangrupakeun kerajaan Talaga.
3.
Motif “ Lauk Ngibing” nyirikeun masyarakat Majalengka anu reseup ngingu
lauk dina balong.
4.
Motif “ Nyai Rambut kasih “ mangrupakeun gambaran tina salah sahiji
inihong (tokoh) carita rakyat sajarah kota Majalengka.
5.
Hiji dei nyaeta motif “ Gedong Gincu “ motif gedong gincu dicandak kulantaran kubakat
seeurna tanggkal buah gedong gincu anu aya ampir ditiap buruan imah nu aya di
majalengka. Eta sababna gedong gincu dicandak janten salah sahiji motif batik
anu nyirikeun kota majalengka jeng sabudeureunna.
Hadirin
anu mulya, nya kawajiban urang sadaya ayeuna, nyaeta ngamumule, miara, ngajaga
ngariksa sakumaha budaya warisan karuhun tea. Patarosanana kumaha carana urang
ngajaga sinareng ngariksa budaya urang sunda ?.
Pamendak
sim kuring mah, kahiji urang sadaya sing rajin
diajar, khususna tina rupi-rupi materi anu aya patalina sareng budaya sunda khususna budaya Majalengka. Urang sing wanoh, sing kenal
kana budaya sunda. Kadua, urang sing heman, sing nyaah kana budaya urang, kana
basa sunda umpamana, urang kudu rancingeus bisi aya batur anu ngaruksak kana
basa sunda, anu nyarita ku basa sunda tapi teu puguh alang ujurna, sunda lain
malayu lain. Urangna sorangan deuih ulah mirucaan nyarita basa sunda bari teu
kantenan undak usukna. Pon kitu deui kana kasenian asli sunda, aya paribasa “jati kasilih ku junti. Degung,
kawih kahihilapkeun da moho teuing kana dangdut elektunan”
Mudah-mudahan,
ti ayeuna kapayun aya kereteg dina manah urang sadaya, hoyong ngamumule,
ngajaga sinareng ngariksa budaya sunda khususna
budaya Majalengka, budaya urang sadaya, Amiin.
Sakitu anu ka sanggakeun pamungkas
pihatur, agung cukup lumur jembar pangampura, tina sadaya kakirangan sareng
kalepatan.
Wabillahi Taufik Wal Hidayah
Wassalamu’alaikum Warahmatullahi
Wabarakatuh
(oleh ; Mohamad Topan)
Tidak ada komentar:
Posting Komentar